Kontribui ba promove transparánsia, akontabilidade no efetividade iha serbisu administrasaun no jestaun públiku
Promove boa governasaun sai nu’udar mekanizmu própriu no importante ida hodi asegura dezenvolvimentu nasionál ho di’ak no efetivu atu bele atinje vizaun ka mehi boot estadu Timor-Leste nian ba livre povu husi ki’ak no mukit.
JSMP durante tempu barak ona mak kontribui ba promove boa-governasaun, prevene no kombate korrupsaun. Intensaun mak atu kontribui ba salvaguarda rikusoin estadu-nasaun nian no haforsa sistema ukun ida ne’ebé moos ka transparante, akontável no efetivu.
Monitorizasaun ba pagamentu subsídiu Covid-19 nu’udar rezultadu serbisu hamutuk ho Komisaun Anti Korrupsaun (KAK) hodi kontribui ba atu asegura no promove boa-governasaun nune’e mós prevene aktu korrupsaun.
JSMP nia parte kontribui ba halo monitorizasaun ba prosesu pagamentu ne’e iha munisípiu balun ne’ebé JSMP nia rekursu bele atinje. JSMP la bele monitoriza iha teritóriu tomak tanba rekursu umanu no finanseiru limitadu.
Iha relatóriu badak ida ne’e, aleinde deskreve kona-ba irregularidade no reklamasaun, JSMP mós halo observasaun jerál hodi anota kona-ba kestaun téknika balun kona-ba prosesu pagamentu ne’e no kumprimentu ba regra prevensaun ba Covid-19. Iha parte ikus, JSMP fornese mós rekomendasaun balun ba parte relevante sira.
Objetivu prinsipál husi atividade monitorizasaun ba pagamentu subsídiu Covid-19 nian ne’e mak atu asegura transparénsia, akontabilidade no efetividade iha serbisu administrasaun no jestaun públiku estadu nian ka em suma atu promove boa-governasaun.
Monitorizasaun ne’e hanesan mekanizmu hodi bele kontribui ba hadi’a serbisu administrasaun no jestaun públiku estadu nian bainhira iha irregularidade, fallansu no inefetividade ruma. Nune’e, iha dokumentu ida ne’e, JSMP mós aprezenta problema no dezafiu sira ne’ebé deskobre no mós aprezenta rekomendasaun balun ba parte relevante sira.
Informasaun detallu kona-bá relatóriu tematiku ne’e bele haree iha link ne’e:TetumPDF